【娛樂熱話】《2024 香港小姐競選》公開 15 強佳麗兒時相片

《2024 香港小姐競選》昨晚（8 月 21 日）起，於無綫官方社交平台陸續公開 15 強佳麗，包括：1 號陳紫佟、 2 號倪樂琳、 3 號王汛文、 4 號謝淑怡、 5 號莊曉婷、 6 號李曼思、 7 號秦冀雯、 8 號盧凱怡 、 9 號陳甜甜、 10 號吳芷靖、 11 號梁嘉莹、 12 號鍾翠詩、 13 號程姜月、 14 號楊梓瑤及 15 號俞可程童年照，15 強佳麗還各自接受了「See Saw 先」獨家專訪，大爆兒時趣事。

由細靚到大
觀乎 15 張「Q 版港姐」童年照，不難發現不少佳麗的美貌是三歲定八十，當中 2 號倪樂琳、 3 號王汛文、 4 號謝淑怡、 8 號盧凱怡及 12 號鍾翠詩的童年照更是靚到不得了。 12 號鍾翠詩拍攝宣傳片時，「神還原」兒時招牌篤面珠可愛手勢，並笑言：「細個嗰時嘅我好鍾意笑同影相，唔鍾意喊」。 2 號倪樂琳則笑稱小時候是搞怪小妹，「我細個比較古靈精怪，見到鏡頭會好鍾意唱歌同跳舞，做啲好搞怪嘅動作。例如我鍾意喺媽咪想影我優美咁彈琴嘅時候，好似傻咗咁 boom boom boom 亂彈。」又笑言相關性格適合參選港姐，「因為唔會令氣氛冷場。」

童年港姐夢
不少佳麗由小時候開始已憧憬參選港姐，分別是 4 號謝淑怡、 5 號莊曉婷、 8 號盧凱怡、 10 號吳芷靖及 11 號梁嘉莹。自小已鍾情閃閃發光東西的 4 號謝淑怡小時候會邊看港姐、邊模仿冠軍佳麗，向鏡頭揮手。 5 號莊曉婷則會與在家中，扮香港小姐。「細個因為短頭髮，會攞啲毛巾扮長頭髮嘅香港小姐。」5 號莊曉婷還透露小時候「超級男仔頭」之謎，「細個時媽咪一定要我哋三兄妹剪短頭髮，我係到中學先可以留長頭髮，嗰刻我好開心。」10 號吳芷靖小時候已想參選港姐的原因很搞笑，她忍不住邊笑邊說：「細個係有偷偷地幻想自己係香港小姐冠軍，因為細個覺得自己好靚，一直都好有自信。」

男仔頭愛打架
令人意外的是不是所有佳麗均從小到大都斯斯文文，9 號陳甜甜及 13 號程姜月小時候竟曾與男生打架。 9 號陳甜甜更笑言小時候試過因為打架，弄致頭髮亂了。「我記得小時候媽媽幫我紮很漂亮的小辮子，放學後小辮子都立起來，就是因為跟男同學打架就沒了。」她補充直到讀大學，才變回斯文清秀。至於 13 號程姜月的打架理由，則是出於正義感。「細個成日同男仔打交，因為覺得啲男仔會蝦啲女仔，我就好睇唔慣。」另值得一提的是，7 號秦冀雯仍是 BB 時，已有相當特別的經歷，相關經歷更與其出生磅數有莫大關係。「我出世時十斤四両，好重，因為太重，啲護士全部 O 晒嘴，仲有記者過嚟採訪我媽咪，準備要登報紙。點知幾日之後，有個十一斤幾嘅小朋友出咗世，佢就搶咗我風頭喇。」

1 號陳紫佟

小時候的陳紫佟眼仔碌碌。

2 號倪樂琳

倪樂琳這張童年照有點似黃美棋。

3 號王汛文

王汛文的笑眼與現在一樣。

4 號謝淑怡

謝淑怡小時候很貪靚。

5 號莊曉婷

聽媽媽的話，莊曉婷兒時剪了一頭短髮。

6 號李曼思

李曼思童年的樣年好似公仔一樣可愛。

7 號秦冀雯

秦冀雯原來是差點上報的超重 BB 。

8 號盧凱怡

盧凱怡的童年夢想是做香港小姐。

9 號陳甜甜

陳甜甜小時候好貪玩，十足男仔頭。

10 號吳芷靖

吳芷靖由 BB 到小朋友階段，變化甚大。

11 號梁嘉莹

擁有健康膚色的梁嘉莹小時候也愛運動。

12 號鍾翠詩

童年到現在，鍾翠詩也擁有大眼睛及小酒渦。

13 號程姜月

程姜月好有正義感，小時候更會為朋友出頭。

14 號楊梓瑤

楊梓瑤現在的樣子同年輕時的媽咪像餅印一樣。

15 號俞可程

俞可程（右）小時候十分精靈。